Maskulinitate zein feminitate berriak, ber-pentsatuak, berreraikiak eta askatzaileak ikertzen ditugu eta haien harira antolatzen dugu gure bizi-ikuspegia, hezkuntzaz eta jaraunspenez jasotako genero identitate murriztaileen ondorioak zein hondakinak behatu, aztertu, aldatu eta alboratu egiten ditugularik, genero heteropatriarkalaren hesiak eraitsi nahirik eta guretzat zein gure ondokoei eta ondorengoei bestelako giza-harreman esparru askeagoa eta zabalagoa eskaintzeko asmoz.

Araba, Gipuzkoa, Bizkaia eta Nafarroa

Gutako batzuk adituak gara genero eta berdintasun gaietan, maskulinitatean eta sexismoan, beste batzuk psikologian eta psikoterapian, soziologian eta antropologian; sendagileak eta arkitektoak, mekanikoak, fruta saltzaile eta erosle, pertsona arruntak eta gizaki normalak gara, adin tarte handikoak eta ikuspegi sozio kultural anitzekoak. Eta batzen gaituen asmoa da egunero gure aldetik zerbait jar dezakegula gizatasunez eta gizalegez elkarrekin bizi ahal gaitezen gero eta berdintasun maila handiagoan.